Ku-dhawaad 60 million oo qof oo ku nool daafaha Caalamka ayaa la sheegay inay ku barakaceen dagaalladda.
Hay’adda QM ugu qaabilsan Arrimaha Qaxootiga (UNHCR) ayaa maanta soo saartay Warbixin Sannadeedka Dhaqdhaqaaqyadda Caalamka, oo ay kaga hadashay dadka qaxootiga iyo kuwa Barakacayaasha uu saameeyey colaadaha.
In ka badan Kala-bar dadka barakacay ayaa waxa saamayn ku yeeshay xiisadaha colaadeed ee ka dhacay dalalka Somalia, Syria iyo Afganistan.
Warbixinta oo loogu magac daray Global Trends Reports ayaa lagu sheegay in sannadkii hore, celcelis ahaan 42,500 oo qof ay maalin kasta noqdaan Qaxooti, Magangelyo-doon iyo Barakacayaal.
Warbixinta waxaa kaloo lagu xusay in 19.5 million oo Qaxooti ku nool yihiin meelo ka baxsan dalalkooda, iyadoo 5.1 million ay yihiin dad u kala dhashay dalalka Somalia, Syria, Falastiin iyo Afganistan.
Dhinaca kale, Madaxa Hay;adda UNHCR, Antonio Guterres ayaa ugu baaqay Beesha Calaamka inay qaadaan mas’uuliyadda badbaadinta Qaxootiga iyo Barakacayaasha uu saameeyo dagaalladda ka dhacay qaar ka mid ah dalalka calamka.
Bishan June 20-da waxaa Calaamka sannad kasta looga dabaal degaa Maalinta Qaxootiga Adduunka (World Refugee Day), wuxuuna dabaaldega sannadkan ku soo aaday iyadoo ay Kumanaan Qaxooti ku geeriyoodeen Tahriibka ay ku maraan Lama-degaannadda iyo Baddaha.
© Warqabadka Radio Dalsan
