Madaxweynaha Puntland, Siciid Cabdullaahi Deni, ayaa maanta oo Arbaco ah ku sii jeeda magaalada Boosaaso, taas oo ah xarunta gobolka Bari. Sida ay sheegeen Ilo wareedyo ka tirsan Madaxtooyada Puntland safarka madaxweynuhu ayaa qeyb ka ah qorshayaal waaweyn oo looga golleeyahay sugidda amniga gobolka, gaar ahaan dagaalka ka dhanka ah kooxaha ku dhuumaalaysta buuraha gobolka Bari.
Wararka la helayo ayaa tilmaamaya in Madaxweyne Deni uu Boosaaso kaga dhawaaqi doono dagaal ballaaran oo lagula dagaallamayo kooxaha Daacish, kuwaas oo muddooyinkii ugu dambeeyay ku sugnaa buuraha Calmiskaad ee gobolka Bari.
Qabanqaabada soo dhaweynta Madaxweynaha iyo wafdigiisa ayaa haatan ka socota Boosaaso, waxaana si weyn loo diyaarinayaa soo dhaweyn heer sare ah oo ay ka qayb qaadanayaan maamulka gobolka, saraakiisha ciidamada, iyo qeybaha kala duwan ee bulshada.
Inta uu joogo magaalada Boosaaso, Madaxweyne Deni ayaa la filayaa inuu kulamo muhiim ah la yeesho odayaasha dhaqanka, bulshada rayidka ah, ganacsatada, iyo saraakiisha amniga, si loo dardargeliyo qorshayaasha lagu sugayo amniga iyo horumarinta gobolka Bari.
Safarka Madaxweyne Deni ayaa imanaya xilli Puntland ay wajaheyso dhibaatooyin amni oo ka dhashay weerarrada kooxaha iyo xaaladaha cakiran ee gobolka, gaar ahaan buuraha ku yaal waqooyiga Bari oo ay kooxaha Daacish iyo Al-Shabaab isku uruursadeen.
