Agaasimaha Hay’adda NISA Mahad Salad ayaa maanta kormeeray isbedelka amni ee Suuqa Bakaaraha, halkaasoo muddooyinkii u dambeeyay amnigeeda uu soo hagaagay, isla markaana laga hortagay falalkii amni darrada iyo dilalkii ka dhici jiray.
Booqashada Taliyaha ee Suuqa Bakaaraha ayaa sidoo kale lagu hubinayay sida ay ganacsatadu u fulisay amarkii kasoo baxay Taliska NISA ee ahaa in dhammaan ganacsiyadu xirtan kaamirooyinka CCTV.
Taliye Mahad ayaa ku dhex lugeeyay suuqa, wuxuu gaar gaar u arkay ganacsatada yar yar iyo maal-qabeennada waa weyn. Si uu u muujiyo isbadalka amni ee ka muuqda Suuqa Bakaaraha, wuxuu taliyuhu la dukaameystay qaar ka mid ah shacabkii Soomaaliyeed ee maanta usoo iib-doontay suuqa Bakaaraha.
Taliyaha hay’adda sirdoonka iyo nabad sugida Qaranka ayaa uga mahadceliyay ganacsatada suuqa Bakaaraha sida wanaagsan ee ay ula shaqeynayan ciidanka, fulintooda amarkii kaamirooyinka CCTV.
Sidoo kale waxa uu ballanqaaday in la xoojin doono ilaalinta amnigooda iyo wada shaqeynta ka dhaxeysa hay’adda NISA iyo ganacsatada Soomaaliyeed.
