Ra’iisul Wasaaraha Xukuumadda Federaalka Soomaaliya, Mudane Xamse Cabdi Barre, ayaa maanta kulan gaar ah ku qaabilay Sii hayaha Ergeyga gaarka ah ee Xoghayaha Guud ee Qaramada Midoobey u qaabilsan Soomaaliya, James Swan. Kulanka ayaa ka dhacay Xafiiska Ra’iisul Wasaaraha, halkaas oo ay si qoto dheer uga wada hadleen arrimaha muhiimka ah ee labada dhinac wadaagaan.
Qoraal ka soo baxay Xafiiska Ra’iisul Wasaaraha ayaa lagu sheegay in mudane Xamse Cabdi Barre uu si diirran u soo dhaweeyay James Swan, isaga oo si gaar ah ugu mahadceliyay taageerada joogtada ah ee Qaramada Midoobay siiso Soomaaliya, gaar ahaan dhinacyada bini’aadantinimada iyo horumarinta hay’adaha dowliga ah. Ra’iisul Wasaare Xamse ayaa adkeeyay sida ay Xukuumadda Dan Qaran uga go’an tahay in ay xoojiso wada-shaqeynta kala dhaxeysa hay’adaha QM, iyadoo xoogga la saarayo mashaariicda muhiimka ah ee kor u qaadaya nolosha bulshada Soomaaliyeed.
Sidoo kale, labada mas’uul ayaa ka wada hadlay sidii loo xoojin lahaa wada shaqeynta u dhexeysa Dowladda Federaalka iyo hay’adaha QM, si loo xaqiijiyo guulaha laga sugayo ee la xiriira horumarinta dalka iyo taageerada dhinacyada kala duwan.
