Ciidamada Xoogga Dalka, gaar ahaan Ururka 141-aad ee Guutada 14-ka October oo ka howlgala degmada Marka, iyo Ciidanka NISA ee halkaas ka hawlgala ayaa shaaciyey inay ku guuleysteen fashilinta miino ay halkaas ku aaseen kooxaha Al-Shabaab.
Saraakiisha ayaa xaqiijiyey in miinadan la geliyey jidka u dhexeeya Marka Cadey iyo Buufow-bacaad. Tallaabada lagu fashiliyey qaraxan ayaa suurta gashay kaddib markii dadka deegaanka xog ku saabsan miinada ay la wadaageen Ciidanka Xoogga Dalka, taasoo keentay in miinada laga saaro goobta iyadoon wax khasaare ah la geysan.
Intaa waxaa dheer, saraakiishu waxay xuseen inay saacadihii la soo dhaafay fuliyeen howlgallo gaar ah oo ka dhan ah Al-Shabaab, kuwaasoo ka dhacay qaybo ka mid ah Shabeellaha Hoose.
Dagaalamayaasha Al-Shabaab ayaa inta badan miinooyin ku aasa waddooyinka muhiimka ah ee ay isticmaalaan ciidamada dowladda iyo dadweynaha shacabka ah, taasoo ay ka dhalato khasaare ba’an. Hore ayaa qaraxyo ka dhacay gobolkaasi ay sababeen dhaawac iyo dhimasho soo gaaray dadka shacabka ah iyo ciidamada dowladda.
