Wasiirka Arrimaha Gudaha Federaalka iyo Dib-u-heshiisiinta Soomaaliya, Mudane Cali Yuusuf (Cali Xoosh), ayaa maanta si rasmi ah u daahfuray shir muhiim ah oo lagu qiimeynayo qaab-dhismeedka sharci iyo kaabayaasha aqoonsiga dhijitaalka ah ee dalka. Shirkan ayaa ka dhacaya magaalada Muqdisho, waxaana uu socon doonaa muddo saddex maalmood ah.
Shirka waxaa ka qaybgalay mas’uuliyiin sare oo ka tirsan dowladda federaalka iyo dowlad goboleedyada, oo ay ka mid yihiin guddoomiyaal iyo agaasimeyaal. Sidoo kale, waxaa shirka joogay wakiillo ka socda Qaramada Midoobay (UNDP) iyo xubno ka tirsan bulshada rayidka ah, kuwaas oo kaalin weyn ka qaadan doona doodaha iyo talo-bixinta la filayo.
Mudane Cabdiweli Timacadde, oo ah Maareeyaha Hay’adda NIRA (National Identification and Registration Authority), ayaa ka hadlay madasha shirka, isagoo tilmaamay muhiimadda uu leeyahay shirkan ee ku aaddan horumarinta nidaamka aqoonsiga qaranka ee Soomaaliya. Wuxuu sidoo kale bogaadiyay dadaallada hay’adaha dowladda iyo kuwa caalamiga ah ee taageeraya nidaamka aqoonsiga dhijitaalka ah ee dalka.
Shirka ayaa diiradda lagu saarayaa sidii loo horumarin lahaa nidaamka aqoonsiga qaranka, oo muhiim u ah hubinta in muwaadiniinta Soomaaliyeed ay helaan aqoonsi sax ah oo casri ah, kaas oo loo adeegsan karo adeegyo kala duwan oo dowladda iyo kuwa gaarka loo leeyahay. Waxaa sidoo kale lagu soo bandhigi doonaa cilmi-baarisyo qoto dheer iyo qorshayaal muhiim ah oo ku saabsan sida loo xaqiijin karo nidaamka aqoonsiga dhijitaalka ah ee dalka.
Shirka ayaa la filayaa in laga soo saaro talooyin iyo qorshayaal muhiim ah oo la xiriira horumarinta nidaamka aqoonsiga dhijitaalka ah ee Soomaaliya, taas oo door weyn ka ciyaari doonta dib-u-dhiska iyo horumarinta dalka. Waxaa la rajeynayaa in shirka uu horseedo go’aanno muhiim ah oo kor u qaada tayada iyo kalsoonida nidaamka aqoonsiga ee dalka.
