Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa gaaray magaalada Asmara ee caasimadda Eritrea, halkaas oo uu booqasho shaqo rasmi ah ku billaabay.
Madaxweynaha Soomaaliya ayaa si diirran loogu soo dhaweeyey Garoonka Diyaaradaha Caalamiga ah ee Asmara, iyada oo uu soo dhaweyntiisa hormuud ka ahaa Madaxweynaha Eritrea, Isaias Afwerki, iyo xubno sare oo ka tirsan dowladda dalkaasi.
Kulanka labada madaxweyne ayaa xoogga lagu saaray sidii loo xoojin lahaa iskaashiga u dhexeeya Soomaaliya iyo Eritrea, iyada oo diiradda la saaray arrimaha gobolka, oo ay ugu muhiimsan yihiin nabadgelyada iyo amniga. Xiisadaha gobolka, gaar ahaan kuwa ka dhex aloosan Soomaaliya iyo Itoobiya, ayaa sidoo kale kamid ahaa mawduucyada muhiimka ah ee labada hoggaamiye ay ka wada hadleen.
Booqashadan ayaa ku soo aadeysa xilli ay sare u sii kacayaan xiisadaha siyaasadeed ee ka dhex jira Soomaaliya iyo Itoobiya, kuwaas oo saameyn ku yeelan kara xaaladda gobolka oo dhan. Eriteria oo qeyb muhiim ah ka ah tababarada iyo taageerada ciidamada Soomaaliya, ayaa horey u martigelisay kumannaan askari oo Soomaaliyeed, kuwaas oo lagu soo tababaray gudaha dalkaas.
