Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa khadka taleefanka kula hadlay Madaxweynaha Aljeeriya, Cabdulmajiid Tabbuun, iyagoo ka wada hadlay arrimo muhiim ah oo la xiriira xiriirka labada dal.
Intii lagu guda jiray wada hadalkan heerkiisu sarreeyo, Madaxweyne Xasan Sheekh wuxuu ugu hambalyeeyey Madaxweyne Tabbuun dib-u-doorashadiisii dhaweyd, taasoo mar kale xaqiijisay kalsoonida shacabka Aljeeriya ay u hayaan hoggaankiisa.
Labada Madaxweyne waxay si gaar ah u iftiimiyeen muhiimadda ay leedahay xoojinta xiriirka laba geesoodka ah ee ka dhexeeya Soomaaliya iyo Aljeeriya. Waxay sidoo kale ka wada hadleen fursadaha horumarinta iskaashiga dhinacyada kala duwan sida dhaqaalaha, amniga, iyo arrimaha diblomaasiyadeed.
Madaxweyne Xasan Sheekh ayaa ku adkeeyey in Soomaaliya ay diyaar u tahay in ay xoojiso xiriirkaas, iyadoo si gaar ah uga faa’iideysanaysa khibradda iyo taageerada Aljeeriya ee ku aaddan dhinacyada kobcinta dhaqaalaha iyo la dagaallanka AS.
Dhanka kale, Madaxweynaha Aljeeriya, Mudane Cabdulmajiid Tabbuun, ayaa isaguna muujiyey sida uu ugu faraxsan yahay xiriirka wanaagsan ee ka dhexeeya labada dal, wuxuuna ballan qaaday in dowladdiisu sii wadi doonto taageerada ay siiso Soomaaliya, gaar ahaan dadaallada nabadaynta iyo dib-u-dhiska dalka. Wuxuu ku booriyey Soomaaliya inay kaalin weyn ka qaadato kor u qaadidda xiriirada Afrikaanka ah iyo in labada dal ay noqdaan kuwo hoggaamiya iskaashiga Afrika oo dhan.
