Shirka Golaha Wadatashiga Qaran ayaa Maanta oo sabti ah ka furmay Xarunta Madaxtooyada Soomaaliya, kaasi oo uu shir guddoominayo Madaxweynaha Jamhuuriyadda Federaalka Soomaaliya Xasan Sheekh Maxamuud.
Shirka oo socon doona muddo labo maalin ah ayaa waxaa looga hadlaya sii amba qaadka Wadashaqeynta Madaxda, si wadajir loogu hirgeliyo qorsheyaasha hortabinta leh ee dhinacyada Amniga, dib-u-eegista dastuurka, doorashooyinka , Garsoorka, Federaalaynta iyo xaaladaha bani’aadanimo sida Abaaraha.
Madaxweyne Xasan Sheekh, Ra’iisul Wasaaraha Xukuumadda xilgaarsiinta, Madaxda maamulada sida: Jubbaland, Puntland, Hirshabeelle, Koonfur Galbeed iyo Galmudug iyo Guddoomiyaha Gobolka Banaadir ahna duqa Magaalada Muqdisho ayaa ka qeyb galaya Shirka Golaha Wadatashiga Qaran.
Waa Shirkii ugu horreeyay ee Golaha Wadatashiga Qaran ee uu shir Guddoomiyo Madaxweyne Xasan Sheekh Maxamuud tan iyo markii la doortay, waxaana xusid mudan in Madaxweynaha uu kulan la qaatay oo kaliya Madaxda maamul Goboleedyada.
