Waxaa la soo gabagabeeyay shirar iyo kullamo uu shir Guddoominayey Madaxweynaha cusub ee Jamhuuriyadda Federaalka Soomaaliya Xasan Sheekh Maxamuud iyo Hey’adaha dhaqaalaha Adduunka u socday toddobaadkaan.
Shirkii ugu danbeeyay ee shalay oo ku qabsoomay aaladda fogaan araga ah ee ZOOM-ka ayaa waxaa Madaxweyne Xasan Sheekh iyo Wasiirka Wasaaradda Maaliyadda xilgaarsiinta Cabdiraxmaan Ducaale Beyle la yeesheen Bangiga Horumarinta Afrika (AFDB).
Bangiga Horumarinta Afrika, Wasaaradda Maaliyadda iyo Madaxweynaha cusub ayaa ka wadahadlay sii wadidda howlaha dib-u-habeynta dhaqaalaha iyo taageerada Bangiga ee Soomaaliya.
Madaxweyne Xasan Sheekh Maxamuud ayaa ballan qaaday in dowladdiisu ay xoogga saari doonto dhammeystirka howlaha deyn cafinta iyo sidoo kale ay xoojin donaan wadashaqeynta Hey’addaha Maaliyadda ee caalamiga ah.
Madaxweynaha cusub ee Jamhuuriyadda Federaalka Soomaaliya Xasan Sheekh oo uu Wasiirka Maaliyadda weheliyo ayaa waxaa ay hore shirar muhiim ah ula qaateen Madaxda Hey’adda IMF iyo Bangiga Adduunka kuwaasi oo dhammaan si guul ah ku soo dhammaaday.
Maalin kahor ayey aheyd markii dowladda Federaalka Soomaaliya iyo Hey’adda IMF ay gaareen heshiis muhiim u ah geeddi socodka deyn-cafinta iyo Dib-u-eegista wajiyada 2aad iyo 3aad Barnaamijka ECF ee dib-u-habeynta hannaanka Maaliyadda iyo Horumarinta dhaqaalaha dalka.
