Hay’adaha sirdoonka Maraykanka ayaa baaritaankooda kusoo gabagabeeyey in buufintii looga shakisanaa howlaha basaasnimada Shiinaha oo dhawaan soo dulmartay Maraykanka ay qayb ka aheyd barnaamij ballaaran oo basaasnimo ay oo wadaan ciidamada Shiinaha.
Xiriirka ka dhexeeya buufintan iyo ciiidamada Shiinaha ayaa markii ugu horaysay Talaadadii waxaa qoray wargeyska Washington Post, kadibna waxaa xaqiijiyay shabakada wararka ee CNN ee fadhigeedu yahay Maraykanka. Buufintan ayaa qayb ka ah diyaarado aan cidina wadin oo kasoo duula gobolka Hainan ee xeebta koonfureed ee Shiinaha.
Wargeyska oo soo xiganaya saraakiil badan oo Maraykan ah oo aan la magacaabin ayaa sheegay in barnaamijka Shiinuhu uu basaasnimo kusoo sameeyay dalalka iyo gobollo ay danaynayaan istaraatiijiyad ahaan, kuwaas oo ay ka mid yihiin Japan, India, Vietnam, Taiwan iyo Philippines.
Mas’uuliyiin ka tirsan maamulka madaxweynaha Mareykanka Joe Biden ayaa sheegay in buufintaas ay ahayd mid sahan ah, waxaana ay duullimaadkaas ku tilmaameen “xad-gudub ka dhan aha madax-bannaanida Mareykanka oo aan la aqbali karin” oo uu Shiinuhu ku sameeyay.
Beijing ayaa ku adkaysatay in buufintan ay aheyd duulimaad cilmi-baaris rayid ah oo si khalad ah ugu ambatay hawada Maraykanka.
Diyaarad dagaal oo uu leeyahay Mareykanka ayaa Sabtidii soo ridday buufintan, xilli ay dul heehaabeysay badweynta Atlaantigga ee xeebta South Carolina.
