Muqdisho – Warar kala duwan ayaa kasoo baxaya madaafiic lagu garaacay qeybo kamid ah magaalada Muqdisho, iyadoo si gaar ah loo beegsaday degmooyin dhowr ah oo ka tirsan gobolka Banaadir, kuwaas oo qaarkood aad ugu dhow xayndaabka Madaxtooyada Soomaaliya.
Goobaha ay madaafiicdu ku dhaceen waxaa si gaar ah loogu sheegay degmooyinka Boondheere iyo Wartanabadda, kuwaas oo labaduba ku yaalla bartamaha caasimadda, meel aan sidaa uga fogeyn xarunta madaxtooyada iyo xarumaha kale ee dowladda.
Goobjoogayaal ku sugnaa meelaha ay madaafiicdu ku dhaceen ayaa u sheegay warbaahinta in mid kamid ah madaafiicda uu ku dhacay Tiyaatarka Qaranka, halkaasoo uu ku dhaawacmay qof shacab ah oo aan weli si rasmi ah loo aqoonsan.
Sidoo kale, wararka laga helayo degmada Wartanabadda ayaa sheegaya in hoobiye kale uu ku dhacay barxadda degmadaasi, taasoo sababtay dhaawaca laba qof oo rayid ah. Dadka deegaanka ayaa sheegay in ay si weyn u maqleen jugta madaafiicda, taasoo cabsi gelisay shacabka ku nool agagaarka goobaha la beegsaday.
Waxaa intaas dheer in hoobiye kale uu ku dhacay guri ku yaalla xaafad ka tirsan degmada Boondheere, balse weli lama xaqiijin khasaaraha ka dhashay dhacdadaasi, maadaama aysan jirin war rasmi ah oo kasoo baxay maamulka degmada ama hay’adaha gurmadka.
Ilaa iyo hadda lama oga tirada rasmiga ah ee khasaaraha dhimasho iyo dhaawac ee ka dhashay duqeyntan, iyadoo ay weli xiran yihiin waddooyinka qaar, islamarkaana aysan jirin war cad oo kasoo baxay laamaha amniga dowladda Soomaaliya.
Maamulka gobolka Banaadir iyo taliska ammaanka Caasimadda ayaan weli ka hadlin dhacdadan, iyadoo shacabka ay weli su’aalo ka qabaan cida ka dambeysay weerarkan iyo ujeedkiisa. Waxaana socda baaritaanno horudhac ah oo ay wadaan hay’adaha ammaanka, iyadoo ilaa iyo hadda aysan caddeyn halka madaafiicdan laga soo tuuray.
Waxaan si dhow ula socon doonnaa wixii faahfaahin dheeraad ah ee kasoo kordha dhacdadan.
