Guddiga hirgelinta doorashada Maamulka Koonfur Galbeed ee SEIT ayaa shaaciyay qaar kamid ah kuraasta deegaan doorashadoodu tahay Magaalada Baydhabo ee Xarunta Gobolka Baay, ahna Caasimadda KMG ah ee Maamulkaas.
Qoraal ay soo saareen Guddiga doorashada ayaa waxaa lagu sheegay inay qabanayaan doorashada afar kursi oo kamid ah kuraasta Golaha Shacabka Baarlamaanka 11-aad ee dowladda Federaalka Soomaaliya.
Guddiga doorashada Koonfur Galbeed ayaa maalmaha soo socda shaacin doona Jadwalka doorashada afarta kursi ay soo saareen, waxaana sidoo kale Guddiga laga sugayaa soo bandhigista Liiska Odayaasha dhaqanka iyo Bulshada Rayidka ee soo xulaya ergada wax dooraneysa.
Koonfur Galbeed ayaa dhawaan soo gaba-gabeeysay deegaan doorashada labaad ee Magaalada Baraawe ee Gobolka Shabeellaha Hoose, iyagoona noqday maamulkii ugu horreeyay ee soo dhameeya deegaan doorashada labaad..
