Iyadoo ay Warbaahinadda Caalamka iyo kuwa Maxaliga ee Kenya maanta shaaciyeen inay Dagaalyahanno ka tirsan Alshabaab ay weerareen ciiddan Kenyan ah oo gelbinaysay dhowr bas oo dad rayid ah waday, kuwaasi oo marayey meel ku dhow Deegaanka Mpeketoni.
Taliyaha Ciiddanka Boliska Kenya, Joseph Boinett ayaa sheegay inay wararkaasi been yihiin.
Hadalkiisa ayaa yimid , kadib, markii ay dad Goobjoogayaal u sheegeen Warbaahinta inay arkeen weerarka Alshabaab iyo Ciiddanka Kenya ku dhex maray duleedka Mpeketoni.
Goobjoogayaasha oo codsaday inaan la magacaabin ayaa u sheegay Wakaalladaha Wararka inay Dagaalamayaasha Alshabaab u adeegsadeen bambooyin iyo qoryo culus weerarkaasi, isla markaana ay tacshiirad ku fureen gaadiidkii ay ciiddanka gelbinayeen.
Weerarkan ayaa yimid hal maalin kadib, markii ay Dagaalamayaasha Alshabaab weerareen Deegaanka Barwaaqo ee Degmadda Mandera, waxaana weerarkaasi lagu dilay 13 shaqaale ka shaqeeya Kaawada Dhagaxa.
Wasiirka Arrimaha Gudaha ee Kenya, Joseph Nkaissery ayaa sheegay inuu weerarkaasi dhacay, iyadoo aan la helin warar dhinaca Sirdoonka oo ka digayo weerarkaasi.
Si kastaba ha ahaatee, weeraradda ay Dagaalamayaasha Alshabaab ka fuliyaan gudaha dalka Kenya ayaa waxay dhacayaan iyadoo Dowladda Kenya sheegtay inay Hay’addaha Ammaanka ku jiraan Heegan Sare, si ay uga hortagaan weeraradda Alshabaab ee soo socda.
© Radio Dalsan
