Millatariga Isra’il ayaa Khamiisti shalay sheegay, in duqeyn cirka ah oo ay bishi hore ku bartilmaameedsadeen batamaha Gaza ay ku dileen Maxamed Deyf oo ahaa madaxa garabka hubeysan ee ururka Xamaas.
Warkan ayaa imanaya maalin kaddib marki magaalada Tehran ee caasimadda dalka Iran lagu khaarijiyay madaxii siyaasadda Xamaas, Ismacil Haniyah.
Bayaan kasoo baxay millatariga Isra’il ayaa lagu sheegay in qiimeyn dhanka sirdoonka ah ay ku ogaadeen, in Maxamed Deyf uu ku dhintay duqeyn ay diyaaradaha dagaalka Isra’il ka fuliyeen aagga magaalada Khan Younis 13-ki bishi July.
Isra’il waxay ku eedeysay Deyf in uu ahaa maskaxdi ka danbeysay weerarki ay Xamaas ku qaadday koofurta Isra’il, 7-badi bishi October ee sannadki hore. Weerarkaas oo ay Isra’il sheegtay in looga dilay ilaa 1,200 oo qof, sidoo kalana ay Xamaas ku soo afduubatay boqollaal kale oo Isra’iiliyiin ah.
Xamas wali ma xaqiijin mana beenin dilka madaxii garabka millatariga, Maxamed Deyf.Duqeynti ay Isra’il ku sheegtay in ay ku dishay sarkaalkaasi ayaa waxaa sidoo kale lagu dilay in ka badan 90 qof oo Falastiiniyiin ah oo ay ku jireen dumar iyo carruur.
