Faah faahinno dheeraad ah ayaa kasoo baxaya Nin ganacsade ah oo Saaka Aroortii hore lagu dilay Magaalada Boosaaso ee Xarunta Ganacsiga Maamulka Puntland.
Wararka nasoo gaaraya ayaa sheegaya in Ibraahim C/raxmaan Cabdi oo kamid ahaa ganacsatada caanka ah ee kasoo jeeda deeganada Koonfur Galbeed  lagu dilay saaka Magaalada Boosaso.
Marxuumka ayaa la dilay isagoo kasoo baxaya Masaajid ku yaalla Boosaaso, waxaana sidoo kale uu ahaa  Guddoomiye ku-xigeenkii Bulshada Koonfurgalbeed ee gobolka Bari.
Dableydii dilka gaysatay ayaa goobta isaga baxsaday, waxaana goobta uu dilku ka dhacay gaaray Ciidamada ammaanka, kuwasi oo howgallo sameeyay, inkastoo aysan jirin cid la sheegay in loo soo qabtay dilka Marxuumka.
Dilalka loo gaysanayo dadka kasoo jeeda degaannada ka baxsan Puntland ayaa maalmihii dambe kusoo badanaya Puntland, waxaana Jimcihii lasoo dhaafayna gurigiisa lagu dhexdilay Khadar Cabdi Cali oo ahaa Guddoomiyaha dhalinyarada Soomaali Galbeed ee Puntland.
.
