Golaha Wakiilada Puntland ayaa maanta magaalada Garoowe ku yeelanaya kulan muhiim ah oo siyaasadeed. Kulankani waa Fadhiga 16-aad ee Kalfadhiga 55-aad ee Golaha Wakiillada maamulka Puntland, waxaana ajandaha ugu muhiimsan ee lagu falanqeynayo uu yahay La Xisaabtanka Golaha Xukuumadda.
Kulankan, Wasiirka Wasaaradda Waxbarashada iyo Tacliinta Sare ee Puntland ayaa hortagi doona Golaha Wakiilada, iyadoo la filayo in xildhibaanada ay su’aalo badan ka weydiiyaan shaqada iyo fulinta hawlaha wasaaradda.
Waxaa sidoo kale la isku raacay in la sameeyo isla xisaabtan dhab ah oo ku saabsan hufnaanta iyo waxqabadka xukuumadda Madaxweyne Siciid Deni.
Kulamada noocan ah ee Golaha Wakiilada iyo u yeeridda Wasiirada ayaa lagu wadaa inay sii socdaan, iyadoo la filayo in wasiiro kale mustaqbalka ay hortagaan Golaha si loo dhammeystiro hawlaha xisaabtanka iyo kormeerka shaqada dowladda.
Kulankan ayaa muujinaya sida ay Golaha Wakiilada Puntland u xoojinayaan doorkooda kormeerka iyo hagista Xukuumadda.
