Golaha Ammaanka ee Qaramada Midoobay ayaa si wadajir ah u ansixiyay qaraar cusub oo lagu beddelayo Hawlgalka Kaalmaynta Qaramada Midoobay ee Soomaaliya (UNSOM) iyada oo loo beddelay Hawlgalka Ku-Meel-Gaarka ah ee Kaalmaynta Qaramada Midoobay (UNTMIS), kaas oo noqon doona mid ku shaqeeya waqti xaddidan.
Beddelkan ayaa yimid ka dib markii ay Dowladda Soomaaliya si rasmi ah ugu baaqday in la soo afjaro hawlgalka muddada dheer ka shaqeynayey dalka ee UNSOM, iyada oo la tixgelinayo baahida loo qabo in Soomaaliya ay xoojiso madaxbannaanideeda iyo awoodda ay uga maarmaan kaalmo shisheeye.
Qaraarkan, oo la ansixiyay iyadoo dhammaan 15-ka xubnood ee Golaha Ammaanka ay taageereen, ayaa dhigaya in hannaanka kala-guurka cusub uu bilaaban doono 1-da Nofeembar 2024.
UNTMIS ayaa la filayaa in ay xoogga saarto taageerada amniga iyo horumarinta maamul-goboleedyada Soomaaliyeed, si loo xaqiijiyo in kala-guurka ku-meel-gaarka ahi uu noqdo mid mira-dhal ah. Waxay sidoo kale UNTMIS kaalin ka qaadan doontaa dib-u-habeynta adeegyada bulshada iyo la-dagaallanka khataraha amni ee ka jira dalka, taas oo qayb ka noqonaysa istaraatiijiyadda muddada-gaaban ee Dowladda Federaalka Soomaaliya.
Beddelka UNSOM ayaa sidoo kale loo arkaa mid si dhaw ula xiriira dadaallada dowladeed ee lagu doonayo in lagu gaadho nabad waarta, waxaana tallaabadani u muuqataa mid tijaabin doonta kartida hay’adaha maxalliga ah ee Soomaaliya ay ugu diyaar garoobayaan hannaanka sugidda amniga qaranka.
