Wararka aan ka heleyno duleedka degmada Buulo-burte ee Gobolka Hiiraan dowlad Goboleedka Hirshabeelle ayaa waxaa ay sheegayaan in barqadii Maanta uu halkaas ka dhacay qarax xoogan oo ahaa miino nooca dhulka aasay ee laga hago meelaha fog-fog.
Qaraxa oo si gaar ah uga dhacay Bar-koontarool oo Ciidanka dowladda Federaalka Soomaaliya ku leeyihiin duleedka Buulo-burte ayaa waxaa lala eegtay Ciidamo halkaas ku sugnaa, waxaana ka dhashay khasaaro isugu jira dhimasho iyo dhaawac.
Inta la xaqiijiyey saddex Askari oo kamid ah Ciidanka dowladda ayaa ku naf-waayey qaraxa lala beegsaday, halka Askari kalena uu dhaawac soo gaaray, sida ay ku warrameen qaar kamid ah mas’uul ka tirsan maamulka degmada oo goobta tegay.
Meydadka Askarta iyo dhaawaca Askariga ayaa laga soo qaaday goobta uu qaraxu dhacay, welina ma jiro wax war ah oo kasoo baxay Maamuka degmada Buulo-burte ee Gobolka Hiiraan oo ay uga hadlayaan qaraxaas ka dhacay duleedka degmadaas.
Al-shabaab ayaa inta qaraxyada noocaan oo kale la beegsaday Ciidanka dowladda Federaalka Soomaaliya, kuwa Maamulka Hirshabeelle iyo Ciidamada ATMIS, waxaana qaraxyada Ciidamada kasoo gaaraya waxyeelo kala duwan.
