Dagaal xooggan oo u dhexeeyay ciidanka dowladda Federaalka Soomaaliya iyo ciidamo macwiisley ah ayaa gelinkii dambe ee Maanta ka dhacay degmada Maxaas ee Gobolka Hiiraan ee Hirshabeelle.
Dagaalkan oo bilowday salaadii casir kadib soona gaaray fiidkii caawa ayaa yimid, kadib markii Askari ka tirsan ciidanka dowladda uu dilay qof shacab ah oo kamid ah dadka deegaanka Maxaas, waxaana falkaas ka carooday macwiisleyda.
Guddoomiyaha Maxaas ee gobolka Hiiraan Muumin Maxamed Xalane oo la hadlay VOA ayaa sheegay in dagaalka dhexmaray labada dhinac uu si kedis ah ku bilowday, isla markaana uu geystay khasaaro dhimasho iyo dhaawac leh.
Guddoomiye Muumin ayaa tilmaamay inay ku guuleysteen joojinta dagaalka khasaaraha dhaliyay, wallow uu ka gaabsaday inuu khasaaraha jira sheego.
Sidoo kale wuxuu intaasi kusii daray Guddoomiyaha inay wadaan baaritaano ku aadan waxa sababay dagaalkii dhexmaray ciidanka macwiisleyda iyo kuwa dowladda ee Maxaas jooga.
Wararkii ugu danbeeyay ee aan caawa ka helayno degmada Maxaas ee Gobolka Hiiraan ayaa sheegaya in xaaladu yahay mid dagan, inkastoo weli xiisad laga dareemayo aaga uu dagaalku ka dhacay.
