Guddoomiyaha Gobolka Banaadir ahna duqa magaalada Muqdisho Yuusuf Xuseen Jimcaale Madaale oo uu wehliyo Taliyaha Boliiska qeybta guud Macallin Mahdi ayaa booqasho ku tagay gurigii ay daganeyd Luul Shiikh Cabdi Jaziira oo uu dhawaan nolosha ku gubay seygeeda.
Taliye Macallin Mahdi oo la hadlay Warbaahinta ayaa xaqiijiyay inay socdaan dadaallo lagu soo qabanayo eedeysane Sayid-cali Macalin Daa’uud oo 26 Jan 2024 gubay xaaskii uu qabay ee Marxuumad Luul Shiikh Cabdi Jaziira, taasi oo shalay geeriyootay.
Taliyaha Boliiska qeybta guud ee Gobolka Banaadir ayaa tilmaamay in dal iyo dibadba meesha lagu arko uusan baxsan doonin oo uu mari doono caddaaladda eedeysanaha oo la sheegay inuu ka baxsaday magaalada Muqdisho.
Dhinaca kale Guddoomiyaha Gobolka Banaadir Yuusuf Xuseen Jimcaale Madaale ayaa ballanqaaday inuu kafaalo qaadayo korriimada carruurta ay ka tagtay Marxuumad Luul Shiikh Cabdi Jaziira oo uu gubay ninkii qabay.
Wuxuu intaas kusii daray Guddoomiye Madaale in eedeysanaha falka geystay ee Sayid-cali Macalin Daa’uud lasoo qaban doono, isla markaana caddaaladda la horkeeni doono, kaasi haatan howlgal lagu baadi goobayo ay laamaha amniga dowladda ka wadaan caasimadda Muqdisho iyo Gobolada dalka
