Wasiiro iyo Xildhibaano ka tirsan Dowladda Federalka ayaa waxay maanta booqdeen guriga ay deggan yihiin carruurtii ay dhashay Marxuumad Hindiya Xaaji Maxamed oo ka mid ahayd Weriyayaasha Radio Muqdisho iyo SNTV, taasi oo isbuucii hore lagu dilay qarax miino.
Wasiirka Warfaafinta ee Xukuumadda Federalka, Maxamed Cabdi Xayir “Maareeye” oo horkacayey Mas’uuliyiintaasi ayaa ka tacsideeyey geeridii Weriye Hindiya, wuxuuna xusay inay Dowladda gacan ka geysan doonto Daryeelka Carruurtaasi.
“Dowladda, waxay carriuurta siinaysaa Daryeel Qaran ilaa ay ka qaan-gaarayaan, waxaana kafaala qaadaynaa noloshooda” ayuu yiri Maareeye oo u tacsideeyey Hooyadda dhashay Marxuumad Hindiya, oo haatan gacanta ku haysa carruurtaasi.
Allaha U Naxariistee, Hindiya Xaaji Maxamed waxay u dhixi jirey Marxuum Liibaan Cali Nuur oo ahaa Weriye u shaqeyn jirey Warbaahinta Qaranka, kaasi oo  isaga iyo Weriyayaal kale lagu dilay qarax ka dhacay Muqdisho bishii September ee sannadkii 2009-kii.
© Radio Dalsan
