Wasiir ku-xigeenka Wasaaradda Warfaafinta Xukuumadda Federaalka Soomaaliya Cabdiraxmaan Yuusuf Cumar Alcadaala ayaa faah faahin ka bixiyey howlgal lagu dilay xubno ka tirsan Al-shabaab oo ka dhacay deegaano ka tirsan Gobolka Shabeellaha Hoose.
Wasiir Alcadaala oo wariyeyaasha kula hadlay magaalada Muqdisho ayaa waxaa uu sheegay in howlgalo ciidanka dowladda Federaalka fuliyeen inta u dhexeeysa Tawakal iyo Garasjeereed ee Shabeellaha Hoose lagu dilay 136 xubnood oo ka tirsan Al-Shabaab.
Wuxuu hadalkiisa intaas kusii daray Wasiir ku-xigeenka Wasaaradda Warfaafinta Xukuumadda in howlgalada oo maalmo socday sidoo kale lagu dhaawacay 98 dagaalame, waa sida uu hadalka u dhigay Cabdiraxmaan Alcadaala oo hadlaayay.
Wasiir ku-xigeenka ayaa waxaa uu tilmaamay in xubnaha la dilay ay ku jiraan saraakiil ka tirsan Al-shabaab, isla markaana lagu burburiyey kayd weyn oo hub, oo deegaanada howlgalka laga fuliyey oo ku lahaayeen dagaalamayaasha Al-Shabaab.
Dowladda Federaalka ayaa dhowr jeer sheegtay in howlgalo ka dhacay deegaano iyo degmooyin ka tirsan Gobolada dalka ku dishay dagaalyahano iyo saraakiil kamid ahaa Al-shabaab, dowladda ayaana weli sii wada howlgalada ay kula dagaalameyso Shabaabka.
