Guddoomiyaha Guddiga doorashada Guddoonka Golaha Shacabka Xildhibaan Cabdirisaaq Cumar Maxamed ayaa ka hadlay doorashada Guddoonka Golaha Shacabka Baarlamaanka 11-aad oo maalmaha soo socda ka dhaceysa Magaalada Muqdisho.
Guddoomiye Xildhibaan Cabdirisaaq Cumar oo Warbaahinta kula hadlay Villa Hargeysa ayaa waxaa uu sheegay in Maanta ay soo Idlaatay hadal-jeedinta Musharaxiinta u tartamaya doorashada Guddoomiyaha Shacabka iyo labadiisa ku-xigeenka.
Wuxuu sheegay Guddoomiye Cabdirisaaq Cumar in doorashada Guddoomiyaha Golaha iyo labadiisa ku-xigeenka lagu qaban doono Xarunta Teendhada Afisyooni ee Xeyndaabka Garoonka diyaaradaha Aadan Cadde ee Magaalada Muqdisho.
Sababta loogu qabanayo doorashada Teendhada ayuu Cabdirisaaq Cumar ku sheegay inay tahay sababo badan oo jira oo ay kamid yihiin Xarunta Viila Hargeysa oo aan qaadeynin dadka kasoo qeyb galaya doorashada iyo Arrimo kale oo la xiriira amniga.
“Waxaa rabaa in shacabka Soomaaliyeed aan la wadaago in aad soo dhammeystirnay howshii naloo idmaday intooba badan, waxa kaliya ee hadda inoo haray ay tahay doorashada, ayna socoto diyaar garoowgeeda†ayuu yiri Xildhibaan Cabdirisaaq Cumar.
Doorashada Guddoonka Golaha Shacabka Baarlamaanka 11-aad ee dowladda Soomaaliya ayaa waxaa lagu wadaa in Magaalada Caasimadda ah ee Muqdisho ka dhacdo 27-ka bishaan Maarso, isla markaana waxaa socda olole xoogan oo ku aadan doorashada dhaceysa.