Diyaaradaasi oo nooceedu ahaa The Hughes MD-500 Defender helicopter ayaa xalay  burburtay, xilli ay ku degi lahayd Garoonka Milliteriga ee  Bar’goni ee Degmadda Lamu.
Labadii Duuliye ee la socotay ayaa la sheegay inay soo gaareen dhaawacyo gubasho ah, waxaana la dhigay Isbitaalka.
Diyaaradda ayaa la sheegay inay ku jirtay Duullimaad Sirdoon oo ay waday xuduudka u dhexeeya Kenya iyo Somalia,
mana kala cadda sababaha rasmiga ee ay Diyaaradaasi u burburtay in la soo riday iyo inay cillad farsamo u dhacday.
Inta badan Dagaalamayaasha Alshabaab ayaa ka hawlgala Deegaanka ay Diyaaradda ku socday, waxayna Dagaalamayaasha Alshabaab saqdii dhexe ee xalay hawlgal ka fuliyeen Degmadda Mandera, kuna dileen 11 shaqaale Kenyaan ka xoogsan jirey Kaawadda Dhagaxa.
Dhinaca kale, Afhayeenka Ciiddanka Kenya, Kolonel David Obonyo ayaa xaqiijiyey shilkaasi iyo inuu olol ka kacay Diyaaradda ka hor intaysan burburin.
Waxa uu intaasi ku daray inay Saldhigga Milliteriga ee Bar’goni ee Degmadda Lamu u adeegsadaan Hawlgalladda ay ka wadaan gudaha dalka Somalia.
Kumanaan ka tirsan Ciiddanka Kenya ayaa  dalka Somalia soo galay bishii October 16-dii  ee sannadkii 2011-kii,  kuwaasi oo  ku biiray Hawlgalka AMISOM.
© Radio Dalsan
