Koox hubeysan ayaa xaafadda siinaay dhinaca xiga degmada Warta-nabadda ee Gobolka Banaadir waxaa ay barqanimadii Maanta oo sabti ah halkaas ku dileen Nin la sheegay inuu Odey da’ ah oo Siinaay laga yaqaanay.
Goobjoogayaal ayaa ku warramay in Odeyga ay toogasho ku dileen rag dhalinyaro ah oo ku hubeysnaa Bastoolado, isagoona la sheegay inuu u geeriyooday rasaas looga dhuftay qeybaha sare ee jirka.
Marxuumka la dilay ayaa waxaa lagu magacaabi jiray Cabdi Sheekh Cali (Cabdi Waran), waxaana goobta uu falku ka dhacay si deg deg ah uga baxsaday raggii ka dambeeyay falkaas ka dhacay xaafadda Siinaay.
Qaar kamid ah Ehelada Marxuumka iyo Ciidamo ka tirsan kuwa Booliska dowladda Federaalka ayaa tegay goobta uu falku ka dhacay, isla markaana qaaday Meydka Cabdi Waran, lamana oga sababta keentay dilkiisa.
Magaalada Muqdisho ee Caasimadda dalka tan iyo markii la guda galay bisha barakeysan ee Ramadaan ayaa waxaa ka dhacay dilal qorsheysan oo ay geysteen rag hubeysan, waxsaana dilalkaas ay qeyb ka noqonayaa dilal horey uga dhacay Muqdisho.
