Deegaanka Yaaqbariweyne ee hoostaga degmada Wanlaweyn, gobolka Shabeelaha Hoose, ayaa waxaa ka socda dagaal culus oo u dhaxeeya ciidamada daraawiishta ee maamulka Koonfur Galbeed iyo maleeshiyaad beeleed deegaanka ka soo jeeda. Xaaladda ayaa sii cakirantay iyadoo dagaalku uu sababay khasaare xooggan oo soo gaaray labada dhinac.
Sida laga soo xigtay ilo wareedyo ku sugan goobta dagaalka, ciidamada Koonfur Galbeed ayaa weerar qorsheysan ku qaaday maleeshiyaad ku sugnaa Yaaqbariweyne iyo tuulooyin ku dhow. Weerarka ayaa la sheegay inuu yimid kadib markii maleeshiyaadkaasi isbaarooyin u dhigeen gaadiidka isticmaalaya waddada u dhaxeysa Wanlaweyn iyo Buurhakaba, taasoo keentay in maamulka Koonfur Galbeed uu go’aansado inuu qaado howlgal milatari oo lagu sifeynayo waddooyinka.
Saraakiisha ciidamada daraawiishta ee Koonfur Galbeed ayaa xaqiijiyay in howlgalka uu ka dhan yahay maleeshiyaadkii isbaarooyinka dhigtay, iyagoo tilmaamay in ay ku guuleysteen inay la wareegaan goobo muhiim ah oo dagaalku ka socday. “Waan ku qasbanahay inaan tallaabo qaadno marka la weeraro shacabka iyo ganacsiga xorta ah ee ka dhex socda gobolkayaga,” ayuu yiri sarkaal ka tirsan maamulka Koonfur Galbeed oo diiday in magaciisa la shaaciyo.
Dhinaca kale, Xildhibaan Daahir Amiin Jeesow ayaa si kulul u cambaareeyay weerarka ay ciidamada Koonfur Galbeed ku qaadeen deegaanka Yaaqbariweyne. Xildhibaanka ayaa ku eedeeyay maamulka Koonfur Galbeed in dagaalka uu yahay mid qabiileysan, isagoo sheegay in maleeshiyaadka deegaanka ay difaacayaan naftooda iyo hantidooda. “Dagaalkan waa mid si cad loogu soo qaaday beel gaar ah, waana arin aan la aqbali karin,” ayuu yiri Xildhibaan Jeesow.
Xildhibaanka ayaa sidoo kale sheegay in dagaalka uu sababay khasaare culus oo soo gaaray ciidamada daraawiishta Koonfur Galbeed, wuxuuna maamulka ku eedeeyay inay masuul ka yihiin dhiigga daadanaya iyo dhibaatada ka dhacday Yaaqbariweyne. “Maamulka Koonfur Galbeed ayaa mas’uul ka ah wax walba oo halkaan ka dhacaya, waxaana naga go’an inaan difaacno dadkayaga,” ayuu yiri.
Xaaladda Yaaqbariweyne ayaa ah mid kacsan, waxaana la filayaa in colaadda ay sii xoogeysato haddii aan xal waara laga gaarin khilaafka u dhaxeeya labada dhinac. Shacabka ku nool deegaannada ku dhow halka uu dagaalku ka socdo ayaa ku jira cabsi iyo welwel, iyagoo ka baqaya in colaadda ay saameyn ku yeelato noloshooda maalinlaha ah. Dadka deegaanka ayaa dalbanaya in si degdeg ah loo joojiyo dagaalka, loona raadiyo xalka wada-hadal iyo nabad lagu heshiiyo.
