Guddoomiyaha Hay’adda Maaraynta Musiibooyinka, Maxamuud Macallin Cabdulle ayaa kulan diiradda lagu saaray qodobbo kala duwan oo la xariira arrimaha gargaarka iyo taageerada mashaariicda adkeysiga la qaatay safiirka Dowladda Imaaraadka Carabta, Md. Axmed j. Al-rumeysi.
Labada masuul ayaa isla meel dhigay, in ka hor curashada bisha Ramadaan gargaar degdeg ah la gaarsiiyo dadka nugul ee fatahaadihii El-nino saameeyeen, in la hagaajiyo biya xireennada muhiimka ah si loo yareeyo qatarta fatahaado ka dhalan kara roobka gu’ga.
Safiirku ayaa wuxuu sidoo kale la wadaagay Guddoomiyaha xogta la xariirta ceelal laga hirgalinayo degaanno baahi biyood qaba, isagoo xusay in la soo gabagabeeyay wajiga 1-aad lana guda-galayo wajiga labaad.
Ugu danbeyn Guddoomiyaha SoDMA Md Maxamuud Macallin ayaa uga mahadceliyay Dowladda Imaaraadka taageerada hagar la’aaneed ee ay la garab taagan tahay Dowladda iyo shacabka Soomaaliyeed.
