Askari ka tirsan dowladda Federaalka Soomaaliya gaar ahaan kuwa Booliska ayaa barqanimadii Maanta oo sabti ah darawal gaari ku dilay meel u dhow Shaleemo Nasri ee degmada Hodan ee magaalada caasimadda ah ee Muqdisho.
Dad goobjoogayaal ah ayaa waxa ay kusoo warrameen in Askariga dowladda oo ku sugnaa barta ciidan ee Shaleemo Nasri uu toogasho ku dilay darawalka gaari oo waday mid kamid ah gaadiidka dadweynaha raacaan ee loo yaqaano Hoomeyda.
Askariga falka geystay oo marka hore isku dayay inuu goobta ka baxsado ayaa durbadii waxaa gacanta ku dhigay ciidamo kale oo kamid ah kuwa amniga oo aaga ka agdhawaa, waxaana wararka ay sheegayaan in la xiray gacan ku dhiiglaha Askariga ah.
Magaalada Muqdisho ayaa waxaa dhowr jeer sidaan oo kale Askar ka tirsan ciidanka dowladda Federaalka Soomaaliya ay si bareer ah ugu dileen darawalo Mooto Bajaaj iyo kuwo kaxeynayay gaadiidka dadweynaha ee BL-ka.
