Warbaahinta Caalamiga ayaa qoray in ay Ilaaladda Xeebaha Talyaaniga u gurmadeen, soona badbaadiyey ilmo yar oo saddex bilood jir ahaa, kaasi oo qeyb ka ahaa in ka badan 90 Tahriibayaal ah oo shalay soo gaaray Jesiiradda Lampedusa.
Hawlgal degdeg ah ayaa wiilka yar looga soo qaaday Doonidii ay hooyadiisa la socotay, kadib, markii uu si kedis ah u xanuunsaday.
Markab ganacsi ayaa soo qaaday wiilkaa yar iyo in ka badna 80 Tahriibayaal ah oo la socday dooni ka soo shiraacatay Xeebaha dalka Libya, kuwaasi oo haatan ku sugan Jesiiradda Lampedusa.
Sidoo kale, Isbitaalladda Lampedusa waxaa lagu daawaynayaa ugu yaraan 20 Tahriibayaal oo ay dhaawacyo gubasho soo gaareen intaysan ka soo ambabixin Xeebaha Libya.
Dadkaasi ayaa la sheegay inay gubteen, kadib, markii ay ku qaraxday Jikadda cuntadda lagu karsado.
Madaxa Adeegga Caafimaadka ee Lampedusa, Domenico Bartolo, ayaa ka dayriyey xaalladda 10 ka mid ah dadkaasi gubtay, oo si xun u wada gubtay.
Bukaanadda kale ayaa la sheegay in loo gudbiyey Isbitaallo ku yaalla Jesiiradda Sishiliya, si loogu daaweeyo.
Haweeney 25-jir oo ka mid ah Dhaawacyadda ayaa ku geeriyootay Badda, inta ay ku soo jireen safarka ay kaga soo shiraacdeen Xeebaha Libya.
Dhinaca kale, Lixdii maalmood ee la soo dhaafay, in ka badan 11,000 oo Tahriibayaal ah ayaa la badbaadiyey, kuwaasi oo haatan ku sugan Talyaaniga.
