Saaka waxaa degan deegaannadii shalay ay ka dhaceen dagaalladii culus ee u dhexeeyay Ciidanka Xoogga Dalka Soomaaliyeed (CXDS), kuwa deegaanka ee loo yaqaan Macawiisleyda, iyo kooxda Al-Shabaab. Howlgallo ballaaran oo lagu xaqiijinayo amniga ayaa ka socda deegaanadaas, iyadoo ciidamada ay si buuxda gacanta ugu dhigeen goobo muhiim ah oo horey ugu sugnaayeen dagaalamayaasha kooxda AS.
Deegaannada Abooreey oo katirsan gobolka Hiiraan, iyo goobo kale oo dhaca xuduudda ay wadaagaan Hiiraan iyo Shabeellaha Dhexe, ayaa shalay noqday xarunta dagaal xooggan oo socday saacado badan. Dagaalkaas oo uu si gaar ah u abaabulay Taliska CXDS ayaa noqday mid ay si buuxda guulo uga gaareen ciidamada isgarabsanaya ee Dowladda iyo shacabka deegaanka.
Sida ay xaqiijiyeen saraakiisha milatariga, dagaalkaas wuxuu sababay khasaare xooggan oo dhanka cadowga ah. Tiro badan oo kamid ah dagaalamayaasha Al-Shabaab ayaa lagu dilay halka kuwa kale lagu dhaawacay ama ay ku firxadeen goobaha ku dhow. Ciidanka iyo Macawiisleyda ayaa ku guuleystay inay burburiyaan saldhigyo muhiim ah oo kooxda AS ay ku lahaayeen deegaanka.
Subaxnimadii hore ee maanta ayaa la arkayay Ciidamada Xoogga Dalka oo ku sugan gudaha iyo daafaha deegaannadii lagu dagaalamay, iyagoo howlgallo baaritaano ah ka wada guryaha iyo dhulalka miyiga ah, si loo xaqiijiyo in aysan jirin wax khatar ah oo ku harsan deegaanka.
Xaaladda guud ee maanta ayaa ah mid degan, inkasta oo laga dareemayo feejignaan milatari oo aad u sarreysa, si looga hortago fal celin kasta oo laga yaabo inay ka timaaddo kooxda Al-Shabaab.
