Ciidanka Xoogga Dalka iyo kuwa deegaanka ayaa saacadihii la soo dhaafay qaaday howlgal ballaaran oo qorsheysan oo ka dhan ah dagaalamayaasha Al-Shabaab, howlgalkaas oo laga fuliyey deegaanno ku yaalla jiinka wabiga Shabeelle ee galbeedka gobolka Hiiraan.
Intii lagu guda jiray howlgalka, ayaa waxaa dhacay dagaal kooban oo dhexmaray ciidamada isgarabsanaya iyo kooxaha Al-Shabaab. Sida ay sheegeen saraakiisha hoggaaminaysa howlgalka, ciidamada dowladda iyo kuwa deegaanka ayaa si buuxda ula wareegay deegaannadii lagu dagaalamay.
Saraakiisha ayaa intaas ku daray in howlgalka uu guulo waaweyn laga gaaray, waxaana gacanta lagu dhigay hub iyo gaadiid dagaal oo ay lahaayeen dagaalamayaasha Al-Shabaab.
Deegaannada sida buuxda loo qabsaday ayaa waxaa ka mid ah Beerayabaal, Qurbabooto, Cadow Gureey, iyo deegaanno kale oo muhiim ah.
Hoggaanka ciidanka ayaa sidoo kale sheegay in howlgaladu ay sii socon doonaan, iyadoo diyaargarowgii ugu dambeeyay ee ka dhan ah Al-Shabaab uu haatan ka socdo aaggaasi.
Waxay ku adkeysteen in dagaalka lagula jiro kooxdan uu sii xoogeysan doono si deegaannada looga xoreeyo.
