Ciidanka Xoogga dalka gaar ahaan kuwa qeybta 21-aad ee ka howlgala Gobolka Hiiraan ayaa saacadihii lasoo dhaafay howlgal qorsheysan ka fuliyay deegaano hoos yimaada Magaalada Buula-burde ee Gobolka Hiiraan ee Maamulka Hirshabeelle.
Ciidamada ayaa la wareegay deegaano dhowr ah oo kamid yihiin Ceemooy, dhagax yaalle, Kilad Gubadleey iyo Ceelka-dabyoole 20KM u jira degmada Buulo Burde, halkaas oo la sheegay inay ku sugnaayeen xubno ka tirsan Al-shabaab.
Saraakiisha hoggaamineysay howlgalka Ciidamada oo la hadlay warbaahinta ayaa u sheegay in sidoo kale Ciidamada ay gacanta kusoo dhigeen doomo ay lahaayeen Al-shabaab oo ku xernaa wabiga shabeelle.
Saraakiisha Ciidamada ayaa tilmaamay inay doomaha ay Shabaabka u isticmaali jireen in ay ku qaataan saanadda, dhaawacyada iyo gurmadka, waxaana ay aheyd bar isku socod oo ay u adeegsadaan gobolada Shabeelooyinka iyo Gobolada dhaxe.
Saraakiisha Ciidanka xoogga dalka ayaa sheegay in ay howlgalka sii wadayaan tan iyo inta laga xureynayo Al-shabaab deegaanada Hirshabeelle, howlgalkaan ayaa waxaa uu kusoo aaday, iyada oo maalmo kahor ay Al-shabaab sheegtay inay xubno ka tirsan kooxda macwiileyda ah ku dishay Gobolka Hiiraan.
