Faah faahino ayaa kasoo baxaya Nin hubeysan oo watay Bastoolad oo maanta oo jimco ah Nin Ganacsade ahaa ku dilay waaxda October ee degmada Hodan ee Gobolka Banaadir, waxaana uu Ninkaas u geeriyooday rasaas qeybaha sare ee jirka looga dhuftay.
Marxuumka la dilay ayaa waxaa lagu magacaabi jiray Ganacsade Isaaq Aadan Cali, waxa uuna la dhashay Guddoomiyihii Gobolka Shabeellaha Hoose haatana ah Wasiirka Cadaalada maamulka Koonfur Galbeed Ibraahim Aadan Cali Najax .
Ninka dilka u geestay ganacsade Isaaq Aadan ayaa la sheegay in ay gacanta ku dhigeen askar katirsan ciidanka dowladda oo ku sugnaa meel aan ka fogeyn goobta uu dilku ka dhacay.
Ciidamada booliiska gobolka Banaadir ayaa soo bandhigay ninka dilka u gestay ganacsadaha, waxa ayna sheegeen Booliska in ninkan loo gudbinayo maxkamadda ciidamada qalabka sida.
Magaalada caasimadda ah ee Muqdisho ayaa waxaa mararka qaarkood ka dhaca dilal qorsheysan oo geystaan rag hubeysan oo ka tirsan Al-Shabaab.
