Sudan: RSF oo ku dhawaaqday xabbad-joojin bini’aadannimo oo saddex bilood ah

Xoogagga Taageerada Degdegga ah ee Sudan (RSF) ayaa Isniintii ku shaaciyay xabbad-joojin bini’aadannimo oo hal-dhinac ah, taasoo socon doonta muddo saddex bilood ah. Tallaabadan ayaa timid maalmo kadib markii taliyaha militariga Sudan, Gen. Abdel Fattah al-Burhan, uu diiday hindise xabbad-joojin caalami ah oo ay soo jeediyeen dhexdhexaadiyeyaal.

Hoggaamiyaha RSF, Maxamed Xamdaan Dagalo “Hemedti”, ayaa muuqaal uu baahiyay ku sheegay in go’aankani uu ka tarjumayo mas’uuliyad qaran iyo ka jawaabista dadaallada diblumaasiyadeed ee caalamiga ah, gaar ahaan hindisaha Madaxweyne Donald Trump iyo dadaallada waddamada Maraykanka, Sacuudi Carabiya, Masar iyo Imaaraadka Carabta.

Hemedti wuxuu sheegay in xabbad-joojintu ay dammaanad qaadi doonto:

• Joojinta colaadaha

• Ilaalinta shacabka

• Gaarsiinta gargaarka bini’aadannimo meelaha ay colaadu dhibaataysay

• Abuuridda hannaan kormeer caalami ah

RSF ayaa sidoo kale ballanqaaday inay fududeyn doonaan hawlaha hay’adaha gargaarka, dhaqdhaqaaqa shaqaalaha caafimaadka, iyo ilaalinta xarumaha samafalka.

Dhanka kale, taliyaha ciidamada Sudan, Gen. al-Burhan, ayaa ku dhaliilay qorshihii ugu dambeeyay ee Mareykanka iyo dhexdhexaadiyeyaasha gobolka inay yihiin “kuwa ugu liita ee abid la soo jeediyo”, isagoo ku andacooday in xabbad-joojintu ay yareynayso awoodda Ciidamada Qalabka Sida isla markaana ay sharciyeynayso joogitaanka RSF ee goobaha ay haystaan.

Burhan ayaa sidoo kale ku eedeeyay ergayga Mareykanka, Massad Boulos, inuu ku hadlayo afka Imaaraadka Carabta oo uu ku tilmaamay dal taageera RSF.