Afhayeenka ciidanka Booliska dowladda Federaalka Soomaaliya Qaasim Axmed Rooble ayaa faah faahin kooban ka bixiyay dab khasaaro hantiyadeed geystay oo saaka ka kacay Suuqa weyn ee Bakaaraha ee magaalada caasimadda ah ee Muqdisho.
Afhayeenka oo saxaafada la hadlay ayaa u sheegay in dabka ka kacay Suuqa Bakaaraha uu marka hore ka dhashay qarax miino oo la dhigay goob qashin ah, sidaasina uu dab xooggan ku qabsaday dhismayaal, kadibna uu kusii faafay goobo Ganacsi.
Wuxuu xaqiijiyay in qaraxa uu ku dhintay hal qof oo joogay Suuqa, sidoo kalena wuxuu intaas kusii daray in dabka uu dhaliyay khasaaro hantiyadeed oo gaaray goobaha Ganacsi eek u yaallay Suuqa Cabdalla Shideeya.
Gubashada suuqa weyn ee Bakaaraha ee magaalada Muqdisho ayaa marar badan soo laa laabatay, iyadoona sidoo kale ay xusid mudan tahay in dabab kale ay sidaan oo kale uga kaceen Suuqyada Xamar-weyne iyo Suuq-bacaad.
