Maamulka Puntland ayaa faahfaahin dheeraad ah ka bixiyay duqeyn culus oo fiidnimadii xalay laga maqlay meel u dhow deegaanka Sheebaab ee Buuraha Calmiskaad, gobolka Bari.
Qoraal kasoo baxay Taliska Ciidamada Difaaca Puntland ayaa lagu sheegay in bartilmaameedka weerarka uu ahaa goob ay ku dhuumaaleysanayeen dagaalyahanno ka tirsan ururka ISIS, kuwaas oo lagu tuhunsanaa inay halkaasi ka wadeen abaabul ciidan.
Sida lagu xusay warbixinta rasmiga ah, duqeynta ayaa lagu dilay tiro badan oo ka tirsan kooxdaasi, iyadoo la xaqiijiyay in ugu yaraan 11 xubnood lagu khaarijiyay hawlgalka.
“Duqeyn waxaa maanta lagu dilay in ka badan 11 xubnood oo ka tirsan Daacish, kuwaasi oo isku urursanayay god u dhow Sheebaab – Calmiskaad. Waxaa duqeynta fuliyey saaxiibada Puntland ee Imaaraadka,” ayaa lagu yiri qoraalka kasoo baxay taliska.
Saraakiisha hoggaaminaysay hawlgalka Ciribtirka Argagixisada ee Puntland ayaa sheegay in weerarkan uu qeyb ka yahay dadaallada joogtada ah ee lagu beegsanayo kooxaha xagjirka ah ee ku sugan gobolka, si loo wiiqo awoodooda.
Warbixintaan ayaa imaanaysa xilli Puntland ay muddooyinkii dambe sare u qaaday dagaalka ka dhanka ah kooxaha Daacish ee ka howlgala gobollada waqooyi-bari ee Soomaaliya.
