Ergayga Madaxweynaha JFS u qaabilsan arrimaha Macawisleyda Cali Jeyte Cismaan ayaa Magaalada Halgan ee gobolka Hiiraan kula hadlay boqolaal Macwiisley ah kuwaas oo loo diyaariyey inay qeyb ka noqdaan dagaalada ka dhanka ah dagaalamaayasha AL-Shaabab ee  deegaannada ka tirsan gobolka Hiiraan.
Cali Jeyte ayaa la dardaarmay macawisleyda uu la hadlay inay u diyaar garoobaan howlgalka, isla markaana laga doonayo reer Hiiraan in ay u midoobaan in gobolkaas uu xor ka noqdo AlShabaab.
Howlgal dhawaan ciidanka xoogga dalka iyo saaxiibada caalamku ka sameeyeen duleedka Halgan ayaa lagu dilay in ka Badan 60 dagaalame, kuwaas oo xogtooda la helay iyaga oo isku aruursanaya deegaan hoos taga Magaaladaas.
