Waxaa dib u dhac ku yimid shir ay dawladda Federaalka Soomaaliya ku baaqday in uu ka dhaco magaalada Muqdisho, kaasoo lagu martiqaaday madaxdii hore hoggaanka u soo qabatay oo ay ku jiraan Madaxweynayaal, Ra’iisul Wasaareyaal, Guddoomiyeyaal Baarlamaan iyo madax kale oo hore dalka xilal uga soo qabatay.
Ujeedada shirkan ka qabsoomi lahaa Muqdisho ee Madaxda la isugu yeeray, martiqaadkana loo fidiyey ayaa ah sidii dawladda Soomaaliya ay â€uga tala galin lahayd, ra’yigoodana u dhegeysan lahayd†madaxda dalka hore u soo hogaamisay.
Dowladda ayaa dooneysa inay ogaato waxa ay ka qabaan Madaxdii qorshaha ay Madasha Wadatashiga Qaran soo bandhigtay bishii May ee ku saabsan doorashooyinka lagu baaqay in dalka ay ka dhacaan ee qof-iyo-cod, iyo hanaanka xisbiyada dalka iyo baabinta xafiiska Ra’iisul Wasaaraha si loo sameeyo Madaxweyne iyo Madaxweyne ku-xigeen.
Sarkaal ka tirsan madaxtooyadda Soomaaliya ayaa BBC u sheegay in kulan uu qeyb ka yahay wada tashi Madaxweynuhu la yeelanayo qeybaha bulshada oo ay ugu horreeyaan madaxdii hore iyo siyaasiyiinta. Waxa uu intaa ku daray in shirka lagu casuumaday dhammaan madaxdii hore, uuna shirkaas Berrito oo Arbaco ah dib u dhacay.
Madaxda casuuman waxaa ka mid ah dhammaan madaxweyneyaashii hore oo ay ka mid yihiin Shariif Sheekh Axmed, Maxamed Cabdulaahi Farmaajo, Ra’iisul Wasaareyaal hore iyo Guddoomiyeyaashii Baarlamaanka oo ay ka mid yihiin Shariif Xasan Sheekh Aadan, iyo Maxamed Cusmaan Jawaari.
Madaxweynihii hore ee Soomaaliya Maxamed Cabdulaahi Farmaajo ayaa BBC u xaqiijiyay in ka cudurdaartay ka qayb galka shirka, oo uu soo dhaweeyay in uu qabsoomo. Afhayeen u hadlay oo lagu magacaabo Cabdirashiid Maxamed Xaashi Duqa ayaa BBC u sheegay sababta uu Farmaajo uga baaqanayo shirka.
“Madaxweyne Farmaajo wuxuu ka cudur daartay inuu ka qayb galo maadaama uu ballamo iyo kulamo hore loo sii qorsheeyey leeyahay,†ayuu yiri Cabdirashiid. Weli waxaan war laga hayn in madaxweyne Cabdiqaasim Salaad Xasan uu ka qayb gali doono iyo in kale.
