Tobanaan qof oo reer Falastiin ah aya lagu dilay duqeymo ay Isra’iil subaxnimadii jimcaha maanta ah fulisay, waxaana sidoo kale ku dhaawacmay dad kale oo ku noolaa xerada qaxootiga Nuseirat ee bartamaha magaalada Qasa.
Wasaaradda caafimaadka ay maamusho Xamaas, ayaa sheegtay in tirada dadka ku dhintay “xasuuqa Nuseirat ay gaartay 30 qof, halka in ka badan 50 qof oo kale lagu dhaawacay, kuwaas oo u badan carruur iyo dad da’a ah.
Waxaa weli socda howlaha baadigobka dad ku hoos jira burburka hoostiisa iyo dhismeyaal kale oo duqeyntu lala eegtay.
Wakaaladda wararka Falastiin ayaa ku soo warrantay in diyaaradda aan duuliyaha lahayn ay weerarro dhowr ah ka geysatay dhismeyaal iyo guryo ku yaalay xerada qaxootiga Nuseirat, kaas oo ilaa 30 qof ay ku dhinteen.
Duqeyn diyaaradeed oo Israa’iil ah fulisay, ayaa waxaa sidoo kale ku dhintay saddex qof oo Falastiiniyiin ah.
Ilaha dawooyinka Falastiin ayaa xaqiijiyay in weerarro ka dhacay magaalada Qasa yan iyo khamiistii ay ku dhinteen 70 qof oo Falstiiniyiin ah, iyadoo 57 kamid ah dhibanayaasha ay ku sugnaayeen bartamaha iyo koonfurta Qasa.
