Gudoomiye ku xigeenka labaad ee Golaha Shacabka Soomaaliya Mahad Cabdala Cawad oo ka jawaabayey Warqad ka soo baxday gudoomiye ku xigeenka 1aad ee Golaha Cabduweli Muudeey ayaa cadeeyey sababta uu ku diidan yahay Go’aanka Gudoomiye Muudeey.
Waxa uu sheegay in Golaha Shacabka uu yahay Hay’ad gudoon leh,isla markaana Go’aan ka gaarista xiliga kulanka uusan laheyn gudoonka balse uu leeyahay gudiga joogtada Golaha Shacabka isla markaana uu dhigayo Xeer hoosaadka u yaalla Baarlamaanka.
Waxa uu hadalkiisa intaasi ku daray in ay waxba kama jiraan tahay warqadii shalay Gelinkii dambe uu soo saaray gudoomiyeku xigeenka 1aad ee Golaha Shacabka Cabduweli muudeey taas oo uu ku iclaamiyey in 31 Maarso la qaban doono kulanka Golaha Shacabka ee codka loogu qaadayo mooshinka ka yaalla gudoomiye Jawaari.
Arrintaan ayaa dhalineysa khilaaf horleh oo soo kala dhexgalay gudoonka Golaha Shacabka,waxana la warsugayaa Maalinta Sabtida ah in kulanka Golaha uu qabsoomo iyo halka lagu qaban doono maadaama gudoomiye Jawaari iyo xildhibaanada taageersan ay diidan yihiin in kulanka Xarunta Golaha Shacabka lagu qabto.
Hoos Ka Dhageyso Codka Gudoomiye ku xigeenka labaad ee Golaha Shacabka Soomaaliya Mahad Cabdala.
