Ilo dhinaca Sirdoonka ayaa sheegay inay Diyaardaha Dagaalka Yuhuudda Waaberigii hore ee saakayto duqeeyeen Dhismo lagu Kaydiyo Hubka oo ku yaalla meel ku dhow Garoonka Diyaaradaha ee magaalladda Dimishiq.
Dhismaha la duqeeyey ayaa la sheegay in lagu kaydiyo  Hubka ay Diyaaradaha Xamuulka ka soo daabulaan dalka Iiraan.
Wasiirka Sirdoonka ee Yuhuudda oo lagu magacaabo Israel Katz  oo haatan ku sugan dalka Maraykanka ayaa xaqiijiyey inay iyaga ka dambeeyeen Duqeynta ka dhacday Caasimadda Syria.
Isagoo la hadlayey Idaacadda Milliteriga Yuhuudda ayaa sheegay inay ka hortageen Hub ay Iiraan si Tahriib ah ku soo geliyaan Syria, loona sii gudbiyo Dagaalyahanadda Xisbullaahi Lubnaan.
Dhinaca kale, Ilo dhinaca Kooxaha ka dagaalama duleedka Dimishiq ayaa sheegay in 5 gantaal lagu dhuftay Bakhaarka Hubka oo ku yaalla duleedka Bari ee magaalladda Dimishiq.
Telefishinka Al-manaar ee Lubnaan ee taabacsan Kooxda Xisbullaahi Lubnaan aaya sheegay inay Diyaaradahaasi duqeeyeen Bakhaar lagu kaydiyo Hubka iyo Haamanka Shidaalka.
Lama soo sheegin dad ay waxyeelo ka so ogaartay Duqeyntaasi.
Ma aha markii ugu horreysay oo ay Diyaaradaha Dagaalka Yuhuudda duqeeyaan bartilmaameedyo ku yaalla Dimishiq, waxayna bishii January ee sannadkan duqeeyeen Saldhigga Milliteri ee Mezze.
©Radio Dalsan
Â
