Xildhibaano ka tirsan labada Aqal ee Baarlamaanka Federaalka Soomaaliya ayaa maanta gaaray magaalada Kismaayo, iyagoo ka qeyb galaya shir wadatashi ah oo uu iclaamiyay Madaxweynaha Jubbaland, Axmed Maxamed Islaam (Axmed Madoobe).
Mas’uuliyiin sar-sare oo ka tirsan maamulka Jubbaland ayaa si diirran ugu soo dhaweeyay wafdiga xildhibaanada garoonka diyaaradaha ee Kismaayo, halkaas oo ay ka bilaabatay xog-wareysi iyo kulamo hordhac ah oo ay xildhibaanadu la yeelanayaan madaxda maamulka.
Madaxweyne Axmed Madoobe ayaa dhawaan baaq u diray xildhibaanada matala Jubbaland ee ku jira labada Aqal, isagoo ku adkeeyay inay si degdeg ah ugu yimaadaan Kismaayo, si loo dardargeliyo wadahadallada muhiimka ah ee ku saabsan mustaqbalka doorashooyinka. Baaqan ayaa imanaya xilli uu taagan yahay khilaaf xoogan oo u dhexeeya maamulka Jubbaland iyo dowladda Federaalka, kaasoo salka ku haya qaabka loo wajahayo doorashada Qof iyo Cod ee dalka.
Qodobka ugu culus ee la isku hayo ayaa ah qaab-dhismeedka doorashada oo Axmed Madoobe doonayo in lagu saleeyo habka Jubbaland u aragto in uu xaqiijin karo hufnaan iyo amni doorasho, halka dowladda dhexe ay ku adkeysaneyso in hanaanka doorashada lagu saleeyo qorshaha qaranka ee ay hogaamineyso Villa Somalia.
Khilaafkan siyaasadeed ayaa maraya meeshii ugu sareysay, iyadoo dhowaan qaar ka mid ah wasiirrada Jubbaland ee ka tirsanaa Golaha Wasiirrada Federaalka ay xilalkooda iska casileen, taasoo sii hurisay xaaladda siyaasadeed ee cakiran.
Magaalada Kismaayo ayaa maalmaha soo socda noqon doonta xarun uu ka furmo kulanka Axmed Madoobe iyo xildhibaanada ka soo jeeda Jubbaland, Go’aamada laga soo saaro kulamadan ayaa la filayaa inay saameyn weyn ku yeeshaan xaaladda siyaasadeed ee dalka iyo xiriirka Jubbaland la leedahay dowladda dhexe.
