Maxkamadda Darajadda Koowaad ee Ciiddanka Qalabka Sida ee Somalia ayaa waxay maanta Xukun dil ah ku riday Xasan Xanafi Xaaji C/salaam, kaasi oo maanta la soo taagay Maxkamadaasi.
Xeer-ilaalinta Maxkamaddaasi, waxay Eedeysanaha ku soo rogeen inuu ku lug lahaa dilka Weriyayaal lagu dilay magaalladda Muqdisho, waxayna Xeer-ilaalinta soo bandhigeen Qiraallo Codad laga duubay Xasan Xanafi oo u hanjabayo Weriyayaasha.
Waxaa kaloo Maxkamadda kaga markhaati furay Markhaatiyayaal la soo istaajiyey daaha gadaashiisa ee Madasha Maxkamaddaasi, kuwaasi oo caddaymo badan bixiyey oo ku aadan eedda loo haystay Eedeysanaha.
Xasan Xanafi Xaaji C/salaam waxaa si gaar ah loogu soo oogay dilkii Suxufiyiinta kala ah: Mahad Axmed Cilmi, Cali Iimaan Sharmaarke, Saciid Tahliil Axmed, Mukhtaar Maxamed Hiraabe iyo Sheekh Nuur Abkey, kuwaasi oo lagu dilay Muqdisho.
Dhinaca kale, Guddoomiyaha Maxkamadda Darajadda Koowaad ee Ciiddanka Qalabka Sida ee Somalia, Kolonel Xasan Cali Nuur “Shuute” ayaa ku dhawaaqay Xukunka  lagu riday Xasan Xanafi Xaaji C/salaam ee ah Dilka Toogashadda.
Waxa kale oo uu sheegay in ciddii aan ku qanacsanayn Xukunkaasi inay Rafcaan ka qaadan karaan.
Xasan Xanafi Xaaji oo ahaa U-qeybsanaha Alshabaab ee Dilalka Suxufiyiinta oo lagu wareystay Telefishinka Dowladda Federalka ee SNTV ayaa waxa uu qirtay inuu ku lug lahaa dilalka Weriyayaasha,wuxuuna codsaday in la cafiyo hadday suurtogal tahay.
©Radio Dalsan
