Waxaa saakay oo sabti ah degan xaalada guud ee Magaalada Dhuusamareeb ee Caasimadda maamulka Galmudug, kadib markii 24-kii saac ee lasoo dhaafay halkaas uu dagaal ku dhexmarayay Ciidanka dowladda Federaalka iyo kuwa Ahlusunna Waljamaaca.
Waaberigii hore ee saakay ayaa waxaa Ciidanka dowladda u suuga-gashay inay gudaha u galaan Xarunta Inji oo ay deganaayeen hogaanka sare ee Ahlusunna, waxaana Ciidanka dowladda isku dhiibay Ciidamadii taabacsanaa Ahlusunna.
Sidoo kale waxaa Ciidanka dowladda Federaalka Soomaaliya  isku dhiibay Hogaamiyeyaashii sare ee Ahlusunna ee Macalin Maxamuud iyo Sheekh Maxamed Shaakir, iyagoona dalbaday in rasaasta laga joojiyo, waxaana amnigooda la wareegay Taliska qeybta 21-aad ee Ciidanka Xoogga.
Dhinaca kale waxaa burbur xoogan uu soo gaaray Xarunta Inji oo hoy u aheyd Ahlusunna, isla markaana in ka badan 24-saac uu ka socday dagaal Culus, waxaana gudaheeda ku dhacay Xarunta Madaafiic xoogan, kuwaasi oo burbur u geystay Xaruntaas.
Sawirro laga soo qaaday dhismeyaasha ku yaalla Xarunta Inji ayaa muujinayay in derbiyada iyo saqaafka sare ee guryaha iyo hoolalka halkaas ku yaalla uu burburay, isla markaana ay ku dhaceen Madaafiic iyo rasaas kale.
