Magaalada Baladweyne ee Xarunta Gobolka Hiiraan ayaa xalay waxaa gaaray Cutubyo ka tirsan Taliska qeybta 21-aad ee Ciidanka dalka Soomaaliya,kuwaasi oo ka soo ruuqaansaday Magaalooyinka Guriceel iyo Dhuusamareeb ee Caasimadda Galmudug.
Ciidanka gaaray Baladweyne ayaa waxaa hogaaminayay Taliyaha qeybta qeybta 21-aad ee Ciidanka dalka Soomaaliya C/Casiis Cabdullaahi Qooje,Taliyeyaasha Guutada 13aad Guutada 15aad, Taliyaha Ururka 21aad ee Danab iyo Saraakiil kale oo Ciidan.
Ujeedka Ciidamadan u gaareen Baladweyne ayaa waxa ay tahay sidii ay qeyb noqon lahaayeen howlgal ka dhan Al-shabaab oo dhawaan laga bilaabi doono deegaanada Galmudug iyo Hirshabeelle ay kaga sugan yihiin.
Dhinaca kale Madaxweynaha dowlad Goboleedka Hirshabeelle Maxamed Cabdi Waare ayaa xafiiskiisa Magaalada Baladweyne kulan kula qaatay Saraakiisha Qaybta 21aad iyo kuwa Danab oo halkaas gaaray.
Taliyaha Qaybta 21-aad ee Ciidanka Xoogga dalka C/Casiis Cabdullaahi Qooje ayaa Madaxweyne Waare uga warbixiyay Ujeedkooda iyo Howlaha Ciidamadu ka wadaan Gobolada Dhexe gaar ahaan Deegaanada Galmudug.
Madaxweyne Waare ayaa ugu dambeyn ku booriyay Howlaha Ciidanka Xoogga Dalka ka wadaan deegaanada Galmudug iyo Hirshabeelle,isagoona bogaadiyay qorshada dowladda ee isku dhafka Ciidanka Qaybaha 27aad iyo 21aad ee Xoogga dalka Soomaaliya.
