Maxkamad Khaas ah oo ku taalla caasimadda dalka Sacuudiga ee Riyadh waxay xabsi 19 sanno ku riday Muwaadin u dhashay dalka Syria, kaasi oo taageerayey Alshabaab iyo Alqaacida.
Wargeyska Arab News oo daabacday Xukunka Maxkamadda ku riday Muwaadinka u dhashay dalka Syria ayaa qortay in Eedeysanaha sheegay in ay Madaxda Dowladaha Carabta yihiin kuwo Diin-laawayaal, loona bahaan yahay in la afgembiyo.
Eedeysanaha oo aan magaciisa la shaacin waxaa la sheegay inuu qorsheynayey inuu u soo ambabaxo Somalia, si uu ugu biiro Dagaalka Alshabaab kula jiraan Dowladda Federalka iyo AMISOM.
Eedeysanaha Kombiyuutarkiisa waxa laga helay dukumentiga Fasaxa Deganaanshaha Sacuudiga oo laq been abuuray, oo uu doonayey inuu ku soo galo Sacuudiga, mark uu ka soo laabto Somalia.
Wargeyska Arab News waxa kale oo uu qoray in Kombiyuutarka Eedeysanaha laga helay codadka Hoggaamiyayaasha Alshabaab iyo qaabka loo farsameeyo Bambooyinka.
Dhinaca kale, waxay Maxkamadda Khaaska ee magaalladda Riyadh xukuntay in Eedeysanaha laga dhoofiyo Sacuudiga marka uu xukunka 19-sanno dhamaysto, kuna soo laaban karin ilaa uu u imaanayo Xaj mooye.
Â
