Ra’iisul Wasaaraha Xukuumadda Federaalka Soomaaliya Xasan Cali Kheyre oo ku sugan Magaalada Xeeraale ee Gobolka Galgaduud ayaa Maanta ku wajahan Magaalada Baydhabo ee Caasimadda KMG u ah maamulka Koonfur Galbeed Soomaaliya.
Qaban-qaabada soo dhaweynta Ra’iisul Wasaare Kheyre ayaa siweyn looga dareemayaa Magaalada Baydhabo,waxaana lagu wadaa in halkaas uu gaaro saacadaha soo socda.
Boqolaal shacab ah ayaa kusii qul-qulaya Garoonka diyaaradaha Baydhabo,kuwaasi oo doonaya inay ka qeyb qaatan soo dhaweynta Xasan Cali Kheyre,waxaana gudaha Magaalada lagu xardhay Sawirada Ra’iisul Wasaaraha Soomaaliya.
Maamulka Koonfur Galbeed Soomaaliya ayaa sheegay inay u diyaar garooweyn socdaalka Ra’iisul Wasaare Kheyre uu ku tegayo Magaalada Baydhabo iyo deegaano kale oo ka tirsan Gobolka Baay.
Ammaanka guud ee Magaalada Baydhabo ayaa Maanya siweyn loo adkeeyay,waxaana heegan buuxa la geliyay Ciidanka dowladda Soomaaliya iyo kuwa maamulka Koonfur Galbeed,kuwaasi oo si wadajir ah isaga kaashanaya amniga Magaalada.
