Casaam Al-mukhsooni oo ka tirsan Xafiiska Hay’adda Muhaajiriinta Caalamiga ee IOM ku leeyihiin magaalladda Cadan ee Koonfurta Yemen ayaa sheegay in Daad-gureeyntaasi si habsami leh u socoto, iyadoo ilaa iyo haatan 150 qof dib loogu celiyey gudaha Somalia.
Waxa uu intaasi ku daray in Hawlgalkaasi iska kaashanayaan IOM, Hay’adda UNHCR iyo Madaxda magaalladda Cadan.
Mashruucaasi dib-u-soo-celinta Soomaalida iskooda u go’aansaday inay isaga soo baxaan dalka Yeman ayaa waxa uu socon doonaa muddo 6 bilood ah.
Xarunta Samafalka iyo Hawlaha Aadminimadda ee Boqor Salmaan Bin C/casiis-ka Sacuudiga ayaa la sheegay inay taageero dhaqaale ku bixinayso Mashruucaasi, waxaana la filayaa  in ilaa 2,500 oo qof oo Soomaali ah lagu soo daad-gureeyo Maraakiib, halka kuwa kalena la soo saarayo Duullimaadyo ka soo degi doona Garoonka Caalamiga ee Diyaaradaha Aadan Cadde ee magaalladdan Muqdisho..
Dhinaca kale, Qunsulka Safaaradda Somalia ee magaalladda Cadan, Maxamed Cumar Sheekh ayaa sheegay inay Safaaradda Somalia ku leedahay Yemen ka qeyb qaadanayso Hawlgalka lagu soo daad-gureynayo dadka Soomaalida ee doonaya in dib loogu soo celiyo dalkooda hooyo.
Qaxootiga Soomaalida ku nool dalka Yemen ayaa waxaa saamayn xooggan ku yeeshay Dagaalladda ka socdo dalkaasi ee u dhexeeya Maleeshiyadda Xuutiyiinta iyo Ciiddanka Dowladda Sharciga ee Yemen oo ay taageeraan Isbahaysiga Milliteri ee ay Sacuudiga hoggaamiso.
Xigasho: عدن بوست –عدن Â
©Radio Dalsan
