Madaxweynihii hore ee Soomaaliya ahna Guddoomiyaha Midowga Musharaxiinta Sheekh Shariif Sh Axmed ayaa Magaalada Muqdisho kulan kula qaatay Wakiilka Qaramada Midoobay u qaabilsan Arrimaha Soomaaliya James Swan.
Kulanka u dhexeeyay Sheekh Shariif iyo James Swan ayaa waxaa looga wada hadlay xaaladihii ugu dambeeyay ee siyaasadda dalka iyo doorashooyinka, sida lagu sheegay Qoraal kooban uu soo saaray Madaxweynihii hore ee Soomaaliya.
Kulanka ayaa waxaa looga arrinsaday inta uu socdau xal u helidda caqabadaha hortaagan dar dar galinta doorashooyinka iyo sidii ay u dhici laheyd doorasho daah furan oo natiijadeeda lagu wada qanci karo, isla markaana heshiis lagu wada yahay.
Madaxweynihii hore ee Soomaaliya ahna Guddoomiyaha Midowga Musharaxiinta Sheekh Shariif Sh Axmed ayaa Wakiilka Qaramada James Swan uga mahadceliyay dadaalada ay wadaan oo ay ku doonayaan in doorashada dalka noqoto mid daah-furan oo si xor ah ku dhacda.
Sheekh Shariif ayaa horey u sheegay in loo baahan yahay in si nabad ah lagu dhammeeyo xal u helidda caqabadaha hortaagan dar dar galinta doorashooyinka, isla markaana ay noqoto mid natiijadeeda lagu wada qanci karo.
